Mosulod pagka-maid iparehistro

Magbabalaod sa probinsiya sa Sugbo miawhag sa Department of Labor and Employment (DOLE) sa pagrehistro sa tanang mosulod og katabang.

Si Bokal Juan Bolo nagkanayon nga kasagaran sa mga katabang mga minor de edad ug adunay mga taho nga gi-abuso ang ilang batakang katungod niini.

Ang kagamhanan sa probinsiya ug ang DOLE nagkahiusa aron maputol ang child labor dinhi sa rehiyon.

Base sa mga taho sa kapolisan adunay mga katabang nga gipang-abuso sa pisikal ug ang uban kanila among-amongan sa ilang mga amo.

Adunay mga katabang nga isog nga misumbong sa otoridad sa nahitabo kanila apan ang uban nagpabiling nagpakahilom tungod sa kahadlok.

Adunay mga ginikanan nga ang ilang mga anak ipasulod pagkakatabang aron makaabag sa panginabuhian ug kasagaran kanila naggikan sa mga probinsiya.

Ang dili makaagwanta sa trabahoon sa panimalay ilabi na kadtong gidaog-daog sa ilang mga amo molayas na lang.

Ang uban dili na mouli sa ilang mga probinsiya tungod sa kahadlok nga ibalik sa ilang mga ginikanan sa giamohan niini ug maoy sinugdanan nga matugpa na hinuon sa prostitusyon tungod kay wala nay laing kapaingnan.

Usa ka minor de edad nga babaye kinsa nagdumili sa pagtug-an sa iyang pangalan nga taga habagatang bahin sa Sugbo nagkanayon nga igo lang siya nakahuman sa elementarya tungod kay wala nay ikagasto ang iyang ginikanan kun mopadayon siya sa iyang pagtuon.

Napugos siya og sulod og pagkakatabang tungod kay wala man siya'y laing mahimo aron makaabag sa kalisod sa iyang ginikanan.

Ang suweldo nga iyang madawat matag buwan ipadala dayon niya kini sa probinsiya.

Apan usahay mohuwam siya og kwarta sa iyang amo tungod kay ang iyang inahan motawag man kini aron mangayo og kwarta.