Security cameras ibutang sa Marcelo Fernan ug Mactan Bridges

Duha ka taytayang nagkonektar sa dakbayan sa Mandaue ug Lapu-Lapu higpit nang ma-monitor sa kapolisan pinaagi sa napulo ka mga security cameras nga imuntar sa maong mga taytayan.

Ang pagbutang sa maong mga camera usa sa pagpangandam sa umaabot nga Association of South East Asian Nation (ASEAN) summit karong Disyembre.

Gibutyag ni Gobernador Gwendolyn Garcia nga ang Lapu-Lapu, Mandaue ug Maritime Police maoy mo-monitor sa maong mga camera nga diha ibutang ang mga tv monitors sulod sa usa ka 40-footer van.

Ang maong van ipahiluna sa ilawom sa Marcelo Fernan bridge para makaminos sa gasto sa kable.

Ang Mactan Cebu Bridge Management Board (MCBMB) kinsa si Garcia maoy tsirman ug ang California Electronics nga maoy supplier sa nahisgutang mga camera mopahigayon og laing tigom para sabotan ang presyo sa mga ekipo nga paliton.

Ang salapi nga ipalit sa camera naggikan sa pundo sa Department of Public Works and Highways (DPWH).

Ang nahisgutang kompaniya mao usab ang supplier sa mga camera nga gi-install diha sa Kapitolyo sa pagkakaron.

Sa labing ulahing report sa intelligence community sa kapolisan ug militar usa sa mga target sa mga teroristang Abu Sayyaf Group, Rajah Sulaiman Movement ang maong mga tulay sunod sa mga malls ug mga barkong magbiyahian gikan sa Sugbu padulong sa Mindanao.