Malapascua dumalahon na sa probinsiya sa Cebu

Gitinguhang ipatuman ang task force nga maoy tahasan pag-atiman sa pagpalambo sa isla sa Malapascua isip usa sa labing nindot nga destinasyon sa mga turista nga moduaw dinhi sa Sugbo.

Si Gobernador Gwendolyn Garcia nagkanayon nga moluwat siya og executive order aron hulmahon ang task force nga mopatuman sa Eco-Tourism Development Plan sa Malapascua.

Sa Miyerkules, pirmahan na ang na-amendar nga memorandum of agreement (MOA) alang sa paghulma og task force nga tahasan pagbantay sa kalihukan sa Malapascua, lakip na ang pagpatuman sa seguridad sa mga coastal ug marine resources sa isla.

Ang orihinal nga MOA napirmahan niadtong Agosto 1, 2003 sa panahon pa ni kanhi Gobernador Pablo Garcia. Nagpinirmahay sa maong MOA ang kagamhanang lokal sa Daanbantayan diin mahisakop ang Malapascua, Department of Environment and Natural Resources, Department of Tourism, Department of Interior and Local Government, Bureau of Fisheries and Aquatic Resources ug Housing and Land Use Regulatory Board ug kagamhanang sa lalawigan sa Sugbo.

Sa maong MOA, gikasabutan nga i-turnover ngadto sa kagamhanan sa lalawigan sa Sugbo ang pagdumala sa Malapascua.

Kini human giuyonan ni Garcia ang hangyo ni Mayor Ma. Luisa Loot.

Si Loot mihangyo kang Garcia sa pag-atiman sa Malapascua tungod kay wala silay igong katakus sa pagpalambo sa maong isla nga gihugpaan og mga lokal ug internasyonal nga mga turista.

Sumala pa nga dili usab kaya sa kagamhanang lokal sa Daanbantayan ang paggukod sa mga malapason sa balaod sama sa mga ilegal nga mananagat, paglimpyo sa mga salvage zone sa mga ilegal nga estraktura, pagpanghipos sa basura ug pagpalambo sa sistema sa tubig mainom sa maong isla.