'Poison letter' gikan politika - Loot

Politika maoy gitumbok nga rason ni Daanbantayan Mayor Maria Luisa Loot nunot niining migawas nga "poison letter" nga mipasangil kanilang duha sa iyang bana nga si Provincial police director Sr.Supt. Vicente Loot isip mga utok sa pagpatay kang Cebu City Market Administrator Elpidio dela Victoria.

Si Loot nga nahinabi sa Banat News sa telepono kagahapon nagdudang may kalambigitan ang maong suwat sa politika diha sa ikaupat nga distrito. Gitumbok niya ang mga Martinez.

Gihagit karon sa mayor sa Daanbantayan ang misuwat sa poison letter sa pagpaila ug pagbarog ug dili magpakasusama sa gihulagway niyang mga "tawong luog."

Nagduda si Loot dihang nahibaw-an niyang dunay kopya nga gihatag ang wala magpailang misuwat sa poison letter ngadto kang Kongresista Clavel Asas Martinez ug Bogo Mayor Celestino Martinez III gawas sa mga kopyang gi-apod-apod ngadto sa mga media outfits ug kang Mayor Tomas Osmeña ning dakbayan sa Sugbo.

Matud pa nga ang misuwat nangangkong diha siya magpuyo sa San Roque, Talisay diin magpuyo si dela Victoria ug mipasangil nga ang mga Loot dunay panagatan sa norte ug naapektahan sa kampanya ni dela Victoria ug sa grupo niining Visayan Sea Squadron.

Gitun-an na karon sa mga Loot ang posibleng pagpasaka og kaso batok sa nagpasiugda niini ug mipagawas sa maong poison letter sa mga media outfits gumikan sa gihulagway nga dili makatarunganong pagduhig sa ilang pangalan sa usa ka tawong wala gani mobutang sa iyang lagda sa maong suwat.

"Amo na ning giduol sa among mga abogado unsa diay mahimo diay nang basta lang ipagawas bisan walay pirma? Unsa may makuha namong Jojo aron among patyon intawon oy!" asoy pang Loot kinsa miangkon hinuon nga pito na ka tuig ang nakalabay nagkatinubagay silang duha ni Jojo gumikan ra usab sa panaglalis sa 'prinsipyo sa trabaho' nilang duha, apan dako iyang pagtuong dunay kalambigitan ang mga Martinez niini.

Si dela Victoria niadtong 1999 miduol kang Loot aron pagpangayo pagtugot nga ang iyang grupo maoy pabantayon sa kadagatan sa maong lungsod apan ang duha nagkasumpaki sa maong isyu apan gihulagway ni Loot nga kadiyot ra kaayo.

Gipanghimakak usab ni Loot nga duna silay panagatan ug mihagit sa mga sakop sa media sa pag-imbestigar niini diha sa ilang lungsod.

Gisuwayan sa Banat News og kuha sa iyang habig sa telepono si Bogo Mayor Martinez kabahin sa pamahayag ni Mayor Loot apan pakyas ang tinguha tungod kay dunay gitambungang panagtigom ang mayor.

Sa pagkakaron gitanggong pa gihapon sa karsel sa dakbayan sa Talisay ang suspek nga si SPO1 Marcial Ocampo kinsa maoy gitumbok sa unom ka mga testigos nga mipatay kang dela Victoria niadtong Miyerkules Santo sa milabay'ng buwan, apan wala pay natumbok nga mastermind ug motibo ang Task Force nga giumol sa Police Regional Office 7 pinanguluhan sa Criminal Investigation and Detection Group 7.