Asembliya sa Guardians anhi himuon sa Cebu

Ang usa ka "general assembly" sa tanang miyembro sa Guardians International Incorporated (GII) sa tibuok nasud gitaktang ipahigayon dinhi sa dakbayan sa Cebu karong ikatulong semana sa Mayo.

Gitataw kini ni Bishop Nilo Tayag, Obispo sa Iglesia Katolika Filipinas Independiente (IKFI) kinsa maoy kasamtangang kalihim heneral sa GII information and education department.

Gipasabot ni Tayag nga ang tumong ning maong panagtagbo mao ang pagpakusog sa suporta sa GII sa kampanya nga gipasiugdahan sa Sigaw ng Bayan Movement (SGM) para sa People's Initiative.

Gitino ni Tayag nga usa sa mga giilang lider sa nagkalainlaing departamento sa GII nga may gidaghanong 2.5 milyones sa tibuok nasud si kanhi Senador Gringo Honasan.

Hinuon wala niya itino kon makatambong ba si Honasan ning ilang gitakdang panagtagbo dinhi sa Sugbo.

Ang GII gisakpan kini sa mga miyembro sa Armed Forces of the Philippines; Philippine National Police; ug ingon mga sibilyan.

Si Tayag usa ka kanhi founding secretary general sa Communist Party of the Philippines-New People's Army (CPP-NPA) kinsa napriso sulod sa 11 ka tuig sa panahon pa sa Martial Law ni kanhi Presidente Marcos.

Sa paggawas niya sa prisohan mieskuyla siya hangtod nga nakab-ot niya ang pagka-obispo sa IKFI.

Usa siya ka inilang lider kanhi sa Kabataang Makabayan sa rehimen ni Marcos, ug naagian niya ang pakiggubat batok sa mga sundawo sa gobiyerno.

Apan iyang gibutyag nga karon na ang panahon nga nakita niya nga gikinahanglan nang hiusahon sa tanan ang pagsagop sa parliamentarya nga sistema sa gobiyerno.