Alarcio gidusong hulip ni Gador

Girekomendar ni Mayor Tomas Osmeña ngadto kang Presidente Gloria Arroyo si Chief Supt. Silverio Alarcio nga maoy mohulip kang Police Regional Office (PRO-7) director Chief Supt. Eduardo Gador nga mo-retiro na sa katungdanan karung sunod bulan.

Sa suwat ni Osmeña ngadto sa presidente nga gipirmahan niini kagahapong adlawa gipasabot niini nga dunay igong katakus ug kasinatian si Alarcio nga maoy modumala sa PRO-7 ilabi na sa mga pagpangandam unya nga himuon may labot sa seguridad atol sa pag-host sa Sugbo sa 12th Asean Summit karung Disyembre.

Base sa rekord ni Alarcio duna kini igong kasinati-an pagdumala og mga police operations sa mga gipahigayong international conference dinhi sa nasud.

Gawas niini, si Alarcio usab ang close-in police commander atol sa gihimong pagbisita dinhi sa nasud ni Pope John Paul II niadtong tuig 1995.

Nakatampo si Alarcio sa seguridad nagmalampuson nga APEC Summit didto sa Subic niadtong tuig 1996.

Nasayran nga si Alarcio mao kini gikauban ni Osmeña sa pagtambung niini sa 11th Asean Summit niadtong milabay'ng Disyembre didto sa Kuala Lumpur Malaysia.