Anak sa DILG-7 official nanulis, arestado sa CITOM

Anak ug pag-umangkon sa dakong opisyal sa Department of Interior and Local Government -7 ang naaresto human nila tulisa ang usa ka taxi kagahapon sa kaadlawon diha sa barangay Inayawan ning dakbayan.

Si Gil Entera, 26, drayber sa RP Corominas taxi nga may plakang 854 miila sa mga suspek nga sila si Peterdith Noval,25, minyo ug kasamtangang nagpuyo sa Sunshine Village sa Inayawan ug ig-agaw niining si Eleazar Noval Hallasco, 23, molupyo sa San Vicente, Liloan.

Matud pa nga gipara sa mga suspek si Entera aron magpahatud sa pinuy-anan ni Noval, apan pagsakay palang sa duha matud pa ni Entera nga gibutang ni Noval ang usa ka paltik nga rebolber diha sa dashboard sa taxi.

Pag-abot sa Sunshine Village giingong wala mokanaog ang duha ug si Noval mition hinuon sa iyang armas sa ulo ni Entera dayong mando paglahos sa Pook, Talisay, samtang nagdagan giingong gikuha ni Noval ang T610 nga cellphone ug kwartang P520 lakip na pitaka.

Giingong pag-abot didto gimandoan siya paadto sa Queensland Hotel sanglit dunay buot pakigkitaan si Noval, human niadto gimandoan na usab siya pag-adto sa SRP sa Talisay dayon sa Cebu City samtang gitiunan sa armas magpunay og mando si Noval sa iyang ig-agaw pagsusi sa emergency bulb sa atop kun nagsiga ba kini.

Ang mga taxi sa Sugbu dunay gibutang nga emergency light aron bisan kinsang tawo nga makakitang magsiga kini nangahulugang nameligro ang drayber sa iyang pasahero.

Pag-abot diha sa dalan P.Del Rosario nasigpatan ni Entera ang sakyanan sa CITOM ug nakadesider sa pagbabag sa iyang taxi atubangan niini dayon daling migawas sa iyang unit ug nagpatabang kang Traffic Enforcer Victor Albacin ug Jose Ray Mandaue.

Wala na makapalag ang duha pagduol sa mga enforcers diin narekober gikan kang Noval ang pitaka ug cellphone ni Entera samtang nagpasad usab ang kwarta diha sa salog ug ang armas diha na sa atubangang lingkuranan.

Ang duha kasamtangang gitanggong sa Theft and Robbery Section alang sa pagpasaka og kaso.