Ang tumong sa pakigtagbo aron sa personal gayod nga pagpahibalo ngadto kanila sa tinguha sa kagamhanan sa dakbayan sa paghingilin niini sa luna nga giukopar nga gihimo niining display center.
Si Atty Rommel Erwin Heyrosa sa legal office sa dakbayan ang kuyogan ni Professor Paulos Cañete sa pag-adto sa buhatan ni Atty Quisumbing.
Si Professor Cañete kinsa maoy director sa gitukod nga city college sa Mandaue maoy tahasan ni Heyrosa sa pagpasabot sa panginahanglan sa maong luna nga maoy tukoran sa edipisyo alang sa kolehiyo.
Samtang si Heyrosa usab ang mopasabot sa mga nalapas sa tagdumala sa maong establisamento kinsa napakyas usab niini sa pagtuman sa kasabutan sa kagamhanan ug sa maong kompaniya.
Si Atty Heyrosa nga gikahinabi sa Banat News ang miingon nga ilang gihimo ang tanang pamaagi nga ibakante sa maong kompaniya ang luna sa kagamhanan nga maoy tukoran og tulunghaan sa kolehiyo.
Dugang pa niya nga wala makatuman sa gipirmahang kasabutan ang tagdumala sa Norkis Trading sanglit gawas nga gihimo kining display center wala pa gayod maugmad ang children park sa maong dapit.