200 ka delegado sa counter- terrorism seminar gi-abi-abi

Mapasigarbohon nga mi-abi-abi si Gobernador Gwendolyn Garcia sa sobra sa 200 ka delagado nga naggikan sa 60 ka nasud kinsa mitambong sa giandam nga panihapon niadtong Huwebes sa gabii diha sa social hall sa Kapitolyo.

Ang maong mga delegado nagrepresentar sa 60 ka nasud nga mitambong sa gipahigayong Counter-Terrorism Experts' Conference (CTEC) dinhi sa Sugbo.

Si Garcia nanghinaut nga ang maong conference mahimong magmalampuson ug adunay mosubang nga maayong plano aron pagsumpo sa terorismo.

Si Ambassador Benjamin Defensor kinsa maoy pangulo sa Philippine Counter Terrorism Experts mipadayag sa iyang pagdayeg ni Garcia tungod sa mapasigarbohong salo-salo nga giandam niini para sa mga delegado.

Atol sa maong panihapon ang University of the Visayas Chorale, Zynkronz & Knapsacks Dancers ug University of San Carlos Dance Troupe mipahigayon og mga awit ug sayaw nga nagpakita sa kultura sa Sugboanon paglingaw sa mga bisita.

Ang kapitolyo miandam usab og mga "Halal" nga pagkaon para sa mga delegado nga naggikan sa nasud nga Islam.

Niadtong Huwebes sa buntag gibuksan ang 1st Philippine CTEC nga gipahigayon sa Shangri-La Mactan Island Resort and Spa.

Mga 500 ka delegado nga gikan sa 60 ka nasud ang nalambigit niini.

Ang mga opisyal sa nasud nanghinaot usab nga dunay makawhat nga maayong paagi ang maong conference nga masumpo ang terismo.