Killer ni Jojo Police Scalawag-R2

Suspek sa pagpatay kang Cebu City Market Administrator Elpidio 'Jojo' dela Victoria gihulagway sa mga opisyal sa police Regional Office 7 nga "badlungon" gumikan sa mga kasong gikalambigitan niini.

Ang hepe sa Regional Investigation and Intelligence Division, Sr. Supt. Agusto Marquez mitug-an atol sa pagpresentar kagahapon kang SPO1 Marcial Ocampo ngadto sa media nga usa kini ka 'typical nga police scalawag.'

Si Marquez nagkanayon nga naapil sa drug watch list si Ocampo sa Camp Crame isip usa ka drug pusher. Giingong duna kini operasyon sa pagpayuhot sa drogas diha sa amihanang bahin sa lalawigan sa Sugbu.

"He is a typical example of a police scalawag," pasangil pa ni Marquez kang Ocampo kinsa niadtong tungura naglingo-lingo sa pasangil batok kaniya.

Dugang sa pasangil mao nga natangtang na kini sa PNP roster gumikan sa pag-AWOL niini pila na ka tuig ang nakalabay apan nakabalik gihapon kini sa serbisyo, nalambigit usab kini sa uban pang kahiwian nga mismong ang iyang mga igsuon mipasaka og kiha batok kaniya diha sa buhatan sa Regional Internal Affairs Service (RIAS7) ug NAPOLCOM.

Si Marquez mitug-an sa Banat News nga niadtong tuig 2003 napositibo si Ocampo sa drug test dihang mipahigayon og kinalit nga drug test ang PRO-7, apan mipalag si Ocampo niini ug mikwestiyon sa resulta.

Midemanda og laing drug test si Ocampo ning tungura dili na ang PNP crime lab ang mihimo, mitumaw sa bag-ong drug test nga negatibo si Ocampo.

Gikiha ni Ocampo si Marquez gumikan sa giingong wala pag-aksyon nga matangtang sa drug watch list sa NAPOLCOM ug Camp Crame, apan gi-clear ang opisyal sa maong kaso.

Mismong si CPPO director Vicente Loot miangkong nakahibalo na siya sa dili maayong rekord ni Ocampo ilabi na sa pagpayuhot niini og drogas sa Norte partikular sa lungsod sa Sta. Fe ug Bogo apan wala gyud nila kini maaresto gumikan kay walay nakuhang lig-ong ebidensya batok sa maong polis.

Si Ocampo sa iyang bahin kusganong mihimakak sa pasangil batok kaniya,ilabi na ang pagpatay kang dela Victoria.

"Dili na tinuod, giimbitar ra ko ni Derilo (Chief Insp. Rex Derilo sa CIDG7), pag-abot sa CIDG gidakop nama hinuon ko, nahibulong ko nganong naingon man ani ang dagan. Basta inosente ko pero andam nakong tubagon tanan pinaagi sa akong abogado kay mikuyog ko kay inosente ko," pangangkon pa ni Ocampo sa ambush interview kaniya sa media.

Si PRO7 director Eduardo Gador mapasalamaton sa upat ka testigos nga diha sa presentasyon pagtudlo kang Ocampo gumikan sa kaisog nilang gipakita, samtang gibutyag nga duna pay laing duha ka testigo ang CIDG7 nga nakuha kagahapon sa buntag.

Giangkon ni Sr. Supt. Jorge Corpuz nga wala pa silay nakitang motibo ug mastermind sa pagpatay maong wala pa nila makunsiderar nga "sulbad na ang kaso."

Niadtong nilabay'ng gabii gironda pinasikad sa search warrant ang pinuy-anan ni Ocampo sa Tres de Abril diin nakuha ang iyang gisuot nga 'bush hat' ug sapatos nga panit nga giingong maoy suot niini pagpusil kang dela Victoria sa Dawis, San Roque, Talisay City niadtong Miyerkules Santo.