Ang biktima mao si Dindo Rondina, 23, ulitawo nga nagpuyo sa maong dapit ug trabahante sa usa ka kompaniya sa dakbayan sa Mandaue.
Base sa imbestigasyon sa kapolisan sa dakbayan sa Danao pinaagi ni SPO4 Rodrigo Roble Jr., nasayran nga samtang nag-atang ug sakyanan si Dindo uban ang iyang uyab sa kadalanan sa Sabang, tulo ka wala mailhing tawo nga luwan sa usa ka motorsiklo ug nagtaptap sa ilang dagway ang miduol kanila ug mideklarar nga tulis.
Matud pa ni Dindo gipangayo sa mga tulisan ang iyang cell phone apan sa dihang mibalibad kini usa sa mga tulisan ang mipusil kaniya tumong sa iyang tiyan hinungdan sa iyang pagkalandig sa Danao District Hospital apan pipila ka gutlo gibalhin ngadto sa Vicente Sotto Memorial Medical Center.
Hinuon adunay anggulo nga gisunod ang kapolisan nga mao ang love triangle kay matud pa wala makuhai og butang ang biktima bisan natumba na kini human sa pagpamusil.
Si Rondina luwas na sa kakuyaw samtang ang tulo ka mga tulisan padayon pang gi-pangita sa kapolisan sa Danao.