Negosyanteng babaye napalgang patay

Ang biktima mao si Alejandra Carcuevas, residente sa maong lugar, naabtan na lang sa kapolisan sa Aloguinsan diha sa sulod sa iyang balay nga natusak sa samad dinunggaban ang lawas niini.

Ang suspetsado mao si Jonathan Pilago, 24-anyos, residente usab sa maong lugar kinsa nasikop sa mga awtoridad diha sa iyang balay ug nagtingkagol na karon sa Aloguinsan sa detention cell.

Si PO2 Roger Uriarte, desk officer sa kapolisan sa Aloguinsan, mibutyag kagahapon sa Banat News nga gituhoang tulis ang motibo sa hitabo tungod kay misulod si Pilago sa balay ni Carcuevas dihang nag-inusara kini tungod kay ang mga sakop sa biktima mitambong sa usa ka disko diha sa lugar.

Matud ni Uriarte nga si Carcuevas usa ka negosyante ug aduna kini tindahan diha sa lugar.

Ang mga gamit niini diha sulod sa balay naabtan usab sa iyang mga kaubang polis nga nangakay-ag.

Si Uriarte nagkanayon nga nakuha gikan sa lugar nga nahitaboan ang usa ka dyes pulgadang gitas-on nga kitchen knife nga nagkadugo ug gituhoang maoy gigamit sa pagdunggab sa biktima ug ang sinena ni Pilago nakit-an usab diha duol sa nahitaboan nga gilabay ug natumog sa dugo.

Apan matud pa ni Uriarte nagsusi pa ang iyang mga kauban sa lugar tungod kay wala pa mapiho ang mga nawagtang nga gamit ni Carcuevas.