Pagsuta sa pirma sa people's initiative humanon-Comelec

Gipasalig sa mga opisyal sa Commission on Election (COMELEC) nga ilang paningkamutang mahuman sulod sa duha ka buwan ang pagsuta sa pirma alang sa People's Initiative (PI) aron mahinayon ang plibisito karong Hunyo.

Kini luyo sa pagduda sa kadaghanan nga maglisod ang taga Comelec pag-apas ning kaapiki sa panahon nga gitakda alang kanila.

Matud pa ni Comelec Officer Simaco Labata sa Cebu City NorthDistrict nga gumikan sa kadaghang kuwestionableng mga pirma, nagkinahanglan usab silag mga tawo nga ikatabang nila niining ilang trabaho karon.

Gipasabot ni Labata nga tinuod nga sila dili eksperto sa pirma, apan kasagaran sa mga pinirmahan sa botante dinhi sa Sugbo dali ra kaayong mailhan bisan tan-awonlang.

Mao man gani nga sayon kaayo nilang napanid-an nga naay mga pirma sa ngalan sa mga botante nga lahi kay sa mga nahaunang pirma niini sa nangaging mga election.

Duna usab silay nadiskobrehang mga pirma sa mga tawong dili rehistrado isip mga botante diha sa Voter's Registration Record.

Sa amihanang bahin sa dakbayan sa Sugbo may gibanabanang mokabat sa 193,000 ka mga botante apan mikapn ra sa 1,500 ang napalgang mipirma sa mga porma sa survey nga gipanghatag sa mga opisyal sa barangay niadtong katapusang Sabado sa Marso kalabot sa PI.

Sa sayo pa nagtuo si Labata nga wa gyud silay madawat nga mga pirma sa mga botante gikan sa mga kabarangayan sa norte.

Apan karong anaa na, gisaad ni Labata nga isip bahin sa tahas ug responsibilidad nga gihatag kanila, bisan sa kahagip-ot sa panahon paninguhaon nilang mahuman ang ilang katungdanan.

Pinaagi niini makabaton og kasulbaran ang suliran bahin sa "charter change" chacha diin ang PI mao nalay katapusang paagi aron mausab ang batakang balaod.