GANGWAR *Duha nangapagan, usa namatay

Laing kagubot na usab ang miulbo tali sa grupo sa mga batan-ong gipareglahan sa gidudahang mga sakop sa fraternity ug gang nga miresulta sa kamatayon sa usa ug pagkaangol usab sa laing usa diha sa dalan Salvador barangay Labangon ning dakbayan niadtong nakalabay'ng gabii.

Ang namatay giilang si Mark Cuba, 25, ulitawo ug molupyo sa Sitio Tuburan sa nahisgutang barangay samtang ang naangol mao si Valentin Panonci, 17, nga molupyo sa nahisgutang lugar.

Sumala pa sa imbestigasyon ni SPO2 Jay Yballe sa Crime Against Person Section nga si Cuba igo rang mikuyog sa iyang mga silingan aron sa pagpalit og ilimnon dihang nakakita og panaglalis ang mga kauban niini sa laing grupo sa mga batan-ong gituohang sakop sa usa ka fraternity ug Bloods gang nga nag-inom diha sa tindahan.

Ang mga suspek gipasanginlan sa grupo ni Cuba nga nianang sayo pa gitabisan ug gigukod pa sila niini hinungdan nga ila kining gikomprontase kung nganong ila kining gibuhat.

Apan sa kainit sa panagsungi , usa sa mga suspek ang milakaw ug sa pagbalik nagdala na kini og wala matinong kalibre sa armas ug gipasa kini sa laing kauban nga mao dayoy mirakrak sa grupo ni Cuba.

Nianang tungura, si Cuba ug Panonci kinsa giingong diha ra pareho sa tapok sa nagbanging grupo maoy naigo sa pagpamusil, si Cuba naigo diha sa dughan samtang si Panonci kinsa diha ra sa kilid sa tindahan naglingkod naigo usab sa iyang walang bagtak.

Daling gidala ang mga samaran sa Cebu City Medical Center apan si Cuba gideklarar nga dead on arrival.

Si Yballe sa pakighinabi sa Banat News nagkanayon nga si Cuba ug si Panonci wala gyuy labot sa panagsungi sa duha ka grupo ug nahitabo lang nga diha sila sa taliwala pagkahitabo.

Human sa hitabo daling miikyas ang mga suspek ug wala na igkita sa kapolisan.Gisubay na karon kung si kinsa ug unsang grupo ang mga responsable. Duha gitumba sa vigilante

Laing duha ka mga lalaki ang wala na mabuntagi kagahapon human gitumba sa mga gidudahang vigilante nga naglihok dinhi sa dakbayan sa managlahing dapit ug takna .

Ang gipangtumba mao sila si David Migallos, 42, ug Christopher Salazar, 21, samtang gitumbok nga mga suspek mao ang mga tawong susama og estilo sa gidudahang vigilante.

Si Salazar kinsa pungkol ang tuong kamot kasamtangang nagduwa og billiards sa usa ka bilyaran daplin sa dalan sa Pier 4 sa barangay Carreta, dihang nangabot ang duha ka mga lalaking luwan sa motorsiklo nga kolor yellow nga pulos nagtaptap sa ilang mga nawong.

Ang backrider maoy mipusil sa ulo sa biktima makadaghang higayon nga nakaingon sa kamatayon niini. Duha ka basiyo sa kalibre 45 ang nakuha sa crime scene.

Samtang si Migallos kasamtangang nagduwa og tong-its wala makabantay sa pag-abot sa duha ka lalaking nagtaptap og panyo diha sa Sitio Lahing-lahing Riverside barangay Mabolo ning dakbayan.

Ang backrider maoy milipot ug mipusil sa biktima diha sa tangkugo ni Migallos. Si Migallos walay rekord sa Bagong Buhay Rehabilitation Center samtang si Salazar maoy makalima na ka higayon nga nagsulod-gawas sa maong bilanggoan sumala pa ni JO1 Catherine Cintos sa pakighinabi sa Banat News.

Nasayran nga si Salazar nasulod sa maong bilanggoan gumikan sa mga kasong paghingos og rugby, pagpanulis, pagdala og mahait nga hinagiban, ug uban pang krimen.