Kini maoy ikaduhang tuig sa pagpasiugda sa maong kalihukan sa matag besperas sa tinuig nga pangilin sa patron sa dakbayan nga si Señor San Jose.
Ang kalihukan nga gimugna ni Mayor Thadeo Ouano ang gipasiugdahan kaniadto sa matag Charter Day sa matag Agosto 30 nga pagpaila sa Mandaue sa kultura sa mga lumolupyo niini.
Nahukman kini sa pagbalhin sa Mayo 7 isip usa sa mga kalihukan nga gihan-ay sa pagsaulog niini sa tinuig nga piyesta nga pagahimuon sa Mayo 8 sa matag tuig.
Matud pa ni Ouano atol sa press conference kagahapon iyang gipasabot nga ang pagpasiugda sa maong kalihukan sa dakbayan maoy kabahin na sa iyang gitinguhang kalambuan.
Si kanhi Konsehal Alfonso Albano nga maoy pangulo sa komitiba nga naghimo sa pagpangandam nagsugod na sa paghan-ay sa mga kalihukan alang karong tuiga.
Naglakip sa mga kalihukan nga gihan-ay nga molungtad og pipila ka semana mao ang Mantawi Festival nga pagaapilan sa mga contingent nga gikan sa kalungsoran ug sikbit nga mga lalawigan nga gidapit sa pag-apil.
Sa pagpakighinabi kang Albano sa Banat News maoy iyang gipadayag nga ilang gipaningkamutan nga labi pa gayod nga mabulokon ang festival karong tuiga.
Gidapit usab ang mga langyaw ug mga balikbayan sa pagtambong sa maong kalihukan.