Giunay pagpusil sa iyang ig-agaw

Usa ka 30 anyos nga lalaki giunay pagpusil sa iyang ig-agaw atol sa tabo sa miaging gabii alas 6:30 ang takna sa Tabayog, bukirang barangay sa Argao.

Ang biktima giila nga mao si Roco Alberca, 30, anyos, ulitawo taga Looc ning lungsod, samtang ang mipusil mao si Allan Alberca, hingkod ang panuigon, taga Lapay, Argao.

Si Roco nakaangkon og samad pinusilan ubos sa walang bahin sa iyang ilok ug wala makalapos ang bala agi sa usa ka rebolber nga maoy gigamit sa suspetsado, pagpusil sa biktima.

Base sa gihimong imbestigasyon sa kapolisan ning lungsod pinaagi ni PO1 Edwardo Senilla miasoy sa Banat News nga ang biktima niadto sa naasoy'ng lugar aron manabo, apan nagkita sila sa iyang ig-agaw nga si Allan.

Giingon nga nakainom nang daan ang biktima. Wala magdugay mitumaw ang panaglalis tali sa biktima ug sa suspetsado, nagtuo ang biktima nga mipauli na lang ang iyang ig-agaw human sa ilang mainiton nga panaglalis.

Apan milabay ang pipila ka minutos mibalik si Allan nga may dala nang armas dayon pusil ngadto sa biktima. Wala pa matino sa kapolisan kun 38 ka o, .357 ang gigamit sa suspetsado, sanglit dali kining misibat palayo sa maong lugar.

Ang biktima nga si Roco daling gihatod sa Vicente Sotto Memorial Medical Center ug padayon pang giatiman sa mga mananambal hangtod ning pagsulat sa balita.