78th IB, Cafgu nakakaplag og MJ plantation

Mga sakop sa 78th Infantry Brigade, Civilian Armed Forces Geographical Unit ug kapolisan sa dakbayan sa Danao nakaibot og 150 ka buhing tanom sa marijuana didto sa Tagaytay, Lawaan, Danao sa milabay'ng adlaw.

Base sa taho ni Sgt. Ferdinand Bagano, detachment commander sa 78th IB sa Lawaan, Danao nga atol sa ilang pagpatrolya kuyog ang mga sakop sa CAFGU ilang nasigpatan ang mga tinanom nga marijuana sa may Tagaytay hinungdan nga ila kining gitaho sa kapolisan sa Danao.

Sa pagresponde sa mga elemento sa kapolisan sa Danao uban ni SPO1 Maximiano Banilad, ilang nasuta nga ang maong yuta nga gitamnan sa mga marijuana gipanag-iya ni Teofilo Ramos.

Matud pa ni Bagano nga una kining higayon nga sila nakakita og mga tinanom nga marijuana sa ilang area bisan pa sa ilang subsob nga pagpatrolya sa mga kaaway sa gobyerno nga anaa magtikawtikaw sa norte nga bahin sa Sugbo.

Ang 150 ka mga tinanom nga marijuana ilang giibot ug anaa karon sa kustodiya sa kapolisan sa Danao, samtang ila pang gisusi ang kalambigitan ni Ramos sa maong mga tinanom nga marijuana.

Matud pa ni SPO1 Banilad kun mapamatud-an nga si Ramos gyud ang tag-iya sa mga marijuana kini mag-atubang og kasong kalapasan sa Akta Republika 9165.