Briton nga nag-pot session overstaying na sa Sugbo-BID7

Si BID 7 Regional Director Geronimo Rosas nga nahinabi sa Banat News mipadayag nga human nila gisuta sa ilang records si Richard John Parker milapas na sa pagpuyo dinhi sa nasud sud na sa usa ka bulan.

Base sa BID record ni Parker si Parker miabot sa Pilipinas niadtong petsa 20 sa bulan sa Septiyembre sa tuig 2001 ug kaupat mi file ug extention sa iyang pagpuyo dinhi sa nasud hangtud sa tuig 2005.

Si Parker kataposan mi file sa iyang extention niadtong Disyembre 5, 2005 ug hangtod lang Pebrero 6 ning tuiga ang iyang legal nga pagpuyo dinhi sa nasud hinungdan nga overstaying alien na si Parker.

Subay niini gipaabot pa gihapon ni Dir. Rosas ang report gikan sa kapolisan sa dakbayan sa Sugbo sa pagsikop ni Parker sa kasong kalambigitan sa ilegal nga drugas.

Posible usab nga i-hold sa BID si Parker samtang dili pa kini makapresentar sa iyang mga dokumento nga nag legalisar sa iyang pagpuyo dinhi sa nasud kay posible nga sa laing branches sa BID si Parker mikuha sa iyang extention apan dinhi sa Sugbo lapas na ang iyang pagpuyo.

Si Parker miluwat ug waiver of detention sa pagpabilin sa iyang pagkatanggong sa buhatan sa Vice Control Section sa kapolisan sa dakbayan sa Sugbo.