Mga NPA sa Tabuelan pasakaa'g kaso sa CCPO

Mopasaka gyud ang Cebu Police Provincial Office og kiha sa mga tawo nga nalambigit sa kalihukan sa mga rebeldeng New People's Army sa lungsod sa Tabuelan.

Kini ang tumong sa gihimong imbestigasyon sa CPPO sa nahitabong ingkwentro tali sa militar ug mga rebeldeng NPA niadtong Domingo sa buntag sa nahisgutang lungsod.

Ang elemento sa Provincial Intelligence and Investigation Branch ang gitahasan ni CPPO director Sr. Supt. Vicente Loot nga maoy nihimo sa imbestigasyon sa lugar aron paghipos sa mga ebidensiya batok sa mga tawo nga mapasakaan og kaso.

Nakig-alayon na ang PIIB sa mga barangay intelligence network sa lugar kinsa maoy unang nihatud sa impormasyon labot sa presensiya sa mga rebelde sa mga bukirang barangay sa lungsod sa Tabuelan.

Gisunod-sunuran sa militar ug kapolisan ang mga rebeldeng NPA hangtud nga natultulan gyud ang ilang gamay nga kampo sa sityo Kalubresan, barangay Dalid, sa maong lungsod ug nahitabo ang pinusilay.

Unang nipaboto sa ilang armas ang mga rebelde sa dihang namatikdan ang presensiya sa militar hinungdan nga duha ang patay diha-diha sa habig sa mga rebelde samtang usa ang namatay sa habig sa militar.

Padayun karon ang pagpangita sa kapolisan ug militar sa ubang sakop nga nakasibat ug sa posibling gitagoan sa mga samaron nga mga rebelde.

Hugot usab nga seguridad ang gipatuman karon sa kapolisan ug militar nunot sa posibling panimawos nga himoon sa mga rebelde.