Mikabat sa P84 mil ang kantidad sa alahas, salapi ug cellphone ang nahanaw apan walay suwerte si Gilbert Bacalpo, 32-anyos, residente sa nahisgutang lugar nasakpan sa mga estambay nga migawas gikan sa nahimutangan sa lawak ni Aloha Larawan, 25-anyos diha sa daplin sa baybayon sa maong lugar hinungdan nga gisita kini ug gitabangan og kulata.
Si Larawan nagkanayon sa pakighinabi niini sa Banat News kagahapon nga atol sa maong insidente diha siya sa ilang tindahan mga pila lang ka metros ang gilay-on gikan sa iyang lawak nagtan-aw og TV ug nakugang na lang siya dihang nagkagubot na ang mga estambay.
Matud ni Larawan nga ang mga estambay na ang misulti kaniya nga migawas gikan sa ilang compound si Bacalpo.
Daling gisusi ni Larawan ang iyang lawak ug nasuta sa biktima nga gilugit ang door knob sa pultahan niini ug nawala na ang iyang mga alahas nga nagkantidad og P60 mil, duha ka cellphone ug salapi nga P4 mil apan ang maong alahas, salapi ug cellphone wala mabawi sa biktima gikan sa suspetsado.
Si Larawan midungag nga iyang gituhoan nga adunay laing mga kauban si Bacalpo ug gipasa sa suspetsado ngadto sa iyang mga kauban ang nahisgutang salapi ug mga butang nga nakawat dayon biya sa lugar ug nabiyaan si Bacalpo, kinsa mihimakak sa maong pasangil sa pakighinabi niini sa Banat News kagahapon.
Gitataw ni Bacalpo nga diha ra siya sa nahisgutang lugar uban sa iyang mga higala aron manglili sa mga maligo sa dagat ug mag-date diha sa daplin sa baybayon.
Nakita siya sa mga estambay diha dapit sa pansayan nga duol sa lawak ni Larawan ug gitabangan siya og kulata.