Gringo nasigpatan sa mga lungsod dinhi's Cebu

Gikonpirmar sa kapolisan sa kalungsoran sa habagatan nga magsuroyan si kanhi Senador Gregorio Gringo Honasan sa ilang lugar.

Si PO2 Agustin Romanos, desk officer sa Alcoy Police Station mitug-an nga niadtong tuig 1990's makatulo ka higayong nasigpatan nila si Honasan nga miistar sa iyang rest house sa barangay Pasol, Alcoy.

Hinuon ning tuig 2000 wa na sila makakita kang Honasan nga misaboy didto sa ilang lungsod ilabi na sa Pasol, matud pa ni Romanos.

Gani may katahap silang higala lang ni Honasan ug dili gyud iya ang duha ka andanang rest house sa Pasol tungod kay babaye man ang ngalang narehistro niini didto sa buhatan sa assesor sa Alcoy.

Wala usay kasayoran ang kapolisan sa lungsod kun paryente ba o higala lang ni Honasan ang maong babaye.

Apan sumala pa sa laing polis sa lungsod nga si SPO1 Paul Resaba nga kun hisgotan lang ang giingong rest house ni Honasan, isip polis nabalitaan usab niyang aduna niini ang wanted nga senador karon sa Barili ug Badian ug bisan sa norte nga bahin ning lalawigan.

Hinuon si SPO1 Rolando Torquido sa Bogo Police Station mikonpirmar nga didto sa Bogo walay rest house si Honasan.

Kini kay ang maong lungsod nagbaton lamang og maayong beach didto sa barangay Nailon, nga maoy utlanan sa Bogo ug Borbon.

Ang mga rest house usab nga gipanarok sa maong baybayon sa Nailon mao ra ang iya ra sa pamilya ni kanhi Kongresista Celestino Martinez Jr. ug sa pamilyang Hisoler.

Nasuta usab ni Torquido nga gikan sa 1980 hangtod karon wala sila makamatikod bisan usa nalang ka higayon nga nahisaboy didto si Honasan ilabi na ang mga Martinez dili kasangga niini.