Mao kini pamahayag ni Regional Director Carolino Mordeno sa Department of Education (DepEd-7) nunot sa pahibawo sa kadagkuan sa departamento pagpalapad ning maong curriculum diha sa elementarya ug sekondaryang tulonghaan nga iya sa kagamhanan.
Sayo niini mipahibawo si Officer-in-Charge (OIC) Secretary Fe Hidalgo sa DepEd sa pagdugang og 56 ka mga eskuylahan sa nasud nga mopatuman sa PSL.
Ang PSL motudlo sa mga estudyante sa mga paagi pagpanalipod sa ilang kaugalingong (self-defense) batok sa mga tawong manlulugos ug uban pang panaogdaog ilabi na batok sa batan-ong kababayen-ang estudyante.
Matud pa ni Hidalgo nga dinhi ning maong curriculum, tudloan ang mga estudyante sa hustong paagi sa pag-atiman sa ilang lawas alang sa maayong postura aron dali ra silang mohamtong sa panghunahuna, plano ug pagbaton sa maayong kaugmaon.
Sumala pa gidayeg sa mga ginikanan ang maong programa tungod kay maghatag kinig hayag nga kaugmaon sa kabataan.
Gisugdan pagpatuman ang PSL niadtong tuig 2000 sa 14 ka eskuylahan nga giisip nga "pilot schools" alang sa PSL.
Kini mao ang tulonghaan nga nahimutang sa Mt. Province, Benguet, Manila, Quezon City, Pasay City, Pampanga, Albay, Cebu, Camarines Norte, Eastern Samar, Northern Samar ug Western Samar.
Tungod sa kamalampuson niini, ipatuman ning tuiga ang pagpalapad sa gidaghanon sa mga eskuylahan diin ipanudlo ang PSL ngadto sa dugang 56 ka mga tulonghaan sa nasud.