CH namilegrong ikiha's mga Ting

Namilegrong mag-atubang og dakong kaso ang kagamhanan sa dakbayan sa Sugbo kon kanunay nga langaylangayon og hangtud dili na unya mabayran ang 4,200 metro kwadrado nga luna ni Roque Ting nga naapil sa South Reclamation Project (SRP).

Matud sa mayor dunay titulo ang pamilyang Ting sa maong luna nga naapil sa pag-ugmad sa maong reclamation project hinungdan nga nakahukom siya nga bayran na lang kini sa siyudad.

Mokabat sa P9 milyones ang gikasabutang bayad sa luna ni Ting apan sa datadata nga paagi nga tag P3 milyones ang matag tuig hangtod nga ma-impas.

Nasayran nga gi-defer atol sa sesyon sa konseho niadtong miaging adlaw ang maong resolusyon ni Konsehal Joey Daluz nga nagtinguha sa pagpalit sa maong luna sa nahisgutang kantidad og naghatag ug gahum kang Osmeña aron maoy makigsabotsabot.

Kini tungod kay alang sa ubang mga konsehal mahal ra kaayo ang nahisgutang kantidad ilabi na kay ang 200 metro kuwadrado sa maong luna dunay tubig.

Apan giinsister ni Osmeña bahala na og kapin sa 200 metro kuwadrado lang ang luna niini ang importante nga mabayran na kini aron makapadayon na sa pag-develop ang dakbayan ug malikay unya sa posibleng kaso nga ipasaka gumikan kay dunay titulo ang pamilyang Ting nga magpamatuod nga nanag-iya sa maong luna.