Matud pa ni Robert Go, presidente sa Cebu Chamber of Commerce and Industry nga ang nahadlokan pag-ayo sa mga negosyanteng Insek mao ang pamasin mga militar ug polis ra usab nga taga Cebu ang mga sakop ning KFR.
Miingon si Go nga usa kini sa hinungdan nga dihang may gidagit nga negosyante niadtong Enero, wa gyuy kisaw ang mga pamilya niini.
Malagmit nakabayad gyud og ransom ang pamilya sa biktima kay gipapauli ra man usab sa ilang pinuy-anan ang biktima.
Ang maong kasayuran nakuha ni Go gikan kang Teresita Ang See, ang lider sa Citizens Against Crime and Corruption.
Hinuon wala ibutyag ni See ang ngalan sa maong Sugboanong gidagit niadtong Enero sa mga sakop sa KFR.
Gani matud pa ni Go nga moanhi karong Biyernes si See sa Cebu aron iyang seminaron ang mga negosyante dinhi.
Iyang tudloan unsaon pag-ila ang mga sakop sa KFR ug unsa usab ang angayang buhaton sa panahon nga dunay madagit sa grupo.
Maoy hinungdan nga giawhag ni Go ang tanan nga magmabinantayon sa kaugalingon.
Gidasonan ni Go ang awhag ni See nga kinahanglang kon may mahitabo di gyud angay nga ililong ngadto sa mga otoridad.