Duha gipaulanan og bala diha's Bo. Luz

Duha ka batan-on gipaulanan og bala sa duha ka mga lalaking nagmotorsiklo nga nagsuot og helmet diha sa atubangan sa usa ka inilang diskohan sa mga batan-on sa dalan Archbishop Rosales ug Cabantan barangay Luz ning dakbayan kagahapon sa kaadlawon.

Wala hinuon ikumpirmar sa kapolisan kun mga vigilante ba ang mga suspek o ba kaha mga tawong gikaatraso sa mga biktimang sila si Leonilo Rodrigo, 17, taga barangay Kalunasan ning dakbayan ug kaubang si Murphy Bolatano Ylanan, 21, taga dalan J. Labra barangay Guadalupe ning dakbayan.

Base sa imbestigasyon sa Homicide Section ang mga biktima gikan sa sulod sa Pump Disco ug migawas aron pagpalit og sigarilyo sa atbang dihang kalit nga miabot ang mga suspek ug ang backrider maoy kalit nga mipaulan og bala sa mga biktima sa walay igong hinungdan.

Si PO3 Rogelio Nedamo sa Homicide Section nagkanayon sa The Freeman/Banat News nga mas dako ang posibilidad nga 'paregla' o ba kaha personal nga kaaway sa mga biktima ang mga suspek, apan giingong ang mga biktima sa dihang gisukit-sukit mihimakak nga duna sila'y kaaway. Wala say nangangkon kung sakop ba sila og fraternity.

Si Rodrigo naigo diha sa walang bukton samtang swerteng ang sininang puti ra ni Bolatano ang nabuslot sa insidente. Daling nangikyas ang mga suspek sa maong lugar samtang daling gidala ang biktima sa tambalanan. - Edwin Ian Melecio