Mga kapitan gibasol mga pamilya midaghan sa sapa

Ang mga kapitan sa kabarangayan maoy gibasul niining pagdaghan sa mga pamilya nga anaa lang magtukod og mga barongbarong aron ilang kapuy-an daplin sa mga kasapaan dinhi sa dakbayan sa Sugbo nga gikonsiderar nga danger zone.

Matud sa consultant sa urban poor sa City Hall Gerry Marquez dunay gahom ang mga kapitan sa kabarangayan nga moluwat og cease and desist order batok niadtong mga pamilya nga magtukod og mga barongbarong daplin sa kasapaan ilabi na kadtong dili makaabot sa pagpalit og luna nga maoy katukoran sa ilang pinuy-anan.

Ang kapakyas sa mga kapitan pagpatuman niini maoy gitumbok ni Marquez nga hinungdan nga misamot karun pagdaghan ang mga pamilya nga anaa lang manimuyo daplin sa mga sapa.

Nasayran sa survey sa Department for the Welfare of the Urban Poor (DWUP) niadtong tuig 2003 mikabat lang og tres mil ka mga pamilya ang anaa manimuyo daplin sa sapa ug sa labing uwahing survey miabot na kini og kapin sa singko mil.

Usa sa gitumbok niini ang Kinalumsan river nga kaniadto pipila lang ka pamilya ang nanimuyo sa kilid niini ug karon miabot na og kapin sa usa ka gatus ka pamilya.

Nunot niini, gitakdang ipaabot ni Marquez kining maong problema atol sa tigum sa Local Housing Board karung Martes aron matawag ang atensiyon sa mga kapitan aron kapugngan ang padayong pagdaghan sa mga pamilya nga nanimuyo sa maong lugar nga gihulagway'ng peligro sa trahedya sama sa mga pagbaha ug landslide ilabi na panahon sa ting-ulan.

Giklaro ni Marquez nga pagkakarun wala pa gyuy natumbok nga lugar ang siyudad sa Sugbo nga angay'ng himuong relocation site sa maong mga pamilya.

Lain usab karon nilang gi-problemahan mao ang posibleng pagpamalik sa lugar sa maong mga pamilya human unya kini ma-relocate.