'Bomba' mibulhogog duha ka tawo

Duha ka tawo ang nabulhog dihang nasabak sa miulbong bomba sa tubig didto sa sitio Muryo-Muryo, Pakigne, Minglanilla niadtong Martes sa gabii.

Ang mga biktima mao sila si Conrado Aneonuevo, 35, minyo ug Lolito Cabrera, 15, taga Muryo-Muryo.

Si SPO1 Ricky Larobes, desk officer sa Minglanilla Police Station miingon nga gidali paghatod sa tambalanan sa dakbayan sa Sugbo ang mga biktima dihang nasuta sa mga silingan nga misidlit ang dugo sa ilang mga mata.

Hinuon matud pa ni Larobes nga wa matangtang ang mga mata sa mga biktima gawas sa grabeng dugo nga mibuhagay niini.

Nasayran nga ang maong boto nga nakapatay-og sa tibuok sitio Muryo-Muryo nagumikan sa "chlorine" nga pinulbos nga gidiretso og yabo didto sa puso artesiano sa Muryo-Muryo.

Matud pa ni Larobes nga ang ka-ignorante sa mga biktima bahin sa hustong paggamit sa chlorine nga itambal sa tubig maoy nakapaamong kanila.

Kay dihang giyabo nila ang usa ka kilong chlorine, subay sa tubo paingon sa ilawom, mibukal ang tubig niini tungod sa reaksyon sa chlorine.

Pagbukal sa tubig sa ilawom, misaka ang "pressure" niini sa ibabaw tungod sa hangin ug miboto.

Ang kakusog sa pressure sa misugwak nga tubig maoy misabak ug mibanda sa nawong ug dagway sa mga biktima kinsa pulos nagyampungad ngadto sa ubos samtang ilang gibubo ang chlorine.

Si Larobes kinsa batid na niining mga butanga nagkanayon nga kon kaantigo pa ang mga biktima, ila untang gikutaw daan sa tubig ang chroline una iyabo sa tubo aron dili mobukal ang tubig.