Aplikante para sa 157 ka stalls sugda'g dawat

Nagsugod na sa pagpanawat ang kagamhanan sa dakbayan sa Sugbo niadtong mga aplikante nga mosalmot sa bidding alang sa interesadong moabang sa 157 ka mga bakanting stalls sa dili mominos unom ka mga merkado publiko dinhi sa dakbayan sa Sugbo.

Gibutyag ni acting City Market Administrator Elpidio dela Victoria Jr. ang mga bakanting stalls nahimutang kini sa Pardo Public market, T. Padilla, Taboan, Freedom Park, Unit-1 Carbon Market ug ang New Ramos Public market.

Giawhag ni dela Victoria ang mga interesadong moabang sa maong mga bakanting puwesto nga makahimo nang moaplay sa buhatan sa Market Operations Division aron makasalmot sa ipahigayon nga pre-qualification bid sa Marso 21.

Ang mga interesadong aplikante giawhag nga mangayo og certification gikan sa barangay nga ilang gipuy-an, certification gikan sa Comelec nga nagpamatuod nga botante kini dinhi sa dakbayan ug mobayad kini og P200 nga application fee sa City Treasurers Office.

Human makuha ang maong mga kinahanglanon isunod niini ang pagbayad og P20 aron ma-isyuhan og certification gikan sa Market Operations Division nga pirmado sa tanang mga market supervisors nga magpamatuod nga wala kini laing puwesto nga giabangan og pagkahuman mobayad na og P500 alang sa bidding.

Ang pagpahigayon sa bidding gitakda sa Marso 28.