P100 mil ihinabang sa mga nasunogan sa Sitio Molave

Kagamhanan sa Talisay mogahin og P100 mil nga salapi aron hinabang sa mga pamilya nga nasunogan niadtong Biyernes diha sa Sitio Molave, Tabunok Talisay.

Gawas sa maong salapi ang nahisgutang mga biktima nakadawat usab og mga pagkaon gikan sa kagamhanan sa dakbayan.

Giawhag ni Mayor Socrates Fernandez ang konseho sa dakbayan nga mopahigayon og special session kagahapon sa hapon aron makaduso og resolusyon alang sa pagpagawas og pundo gikan sa calamity fund nga hinabang sa nabiktima sa sunog.

Si Fernandez mibutyag nga ang ubang mga pamilya nga nasunogan naa gihapon diha sa lugar ug nagpabarog kini og mga tent alang sa temporaryo nilang katulgan ug ang uban kanila naa magsaka sa ilang mga paryente.

Si Felipa Solana, pangulo sa Department of Social Welfare and Development (DSWD) sa siyudad mibutyag nga ang mga tag-iya sa balay nga nahurot pagkasunog ang kabtangan niini makadawat og P15 mil, P5 mil sa mga nag-abang lang og balay nga nalakip sa sunog, P7,500 sa mga tag-iya sa balay nga dunay 50-60 porsiyento nga danyos sa sunog, ang mga boarders nga nalakip pagkasunog ang tanang mga gamit makadawat og P3 mil nga hinabang ug P1,500 sa mga tag-iya sa balay diin adunay 5-10 porsiyento lang nga danyos sa sunog.