Konseho wala pay imik sa private lot sa SRP

Wala gihapon makadesisyon ang mga sakop sa konseho sa dakbayan sa Sugbo kon ila bang aprobahan ang tinguha ni Mayor Tomas Osmeña nga planong pagpalit sa luna nga apektado sa katukoran sa Mambaling Access Road nga nagdugtong sa South Coastal Road sa SRP.

Atol sa executive session sa konseho kagahapon sa buntag personal nga mitambong si Osmeña aron pasabton ang mga konsehal sa katuyoan ning desisyon niya nga pagpalit sa luna ni Roque Ting nga na-apektuhan sa katukoran sa maong reclamation project.

Ang pamilyang Ting duna kiniy 6 mil metro kuwadrado nga luna nga naapektuhan sa pagbukas sa Mambaling Access Road ug laing 4 mil metro kuwadrado nga nasulod sa reclamation area.

Kining maong luna maoy gibasehan sa mga lokal nga opisyal sa siyudad sa Talisay pag-claim sa portion diha sa SRP nga nasakop sa ilang hurisdiksyon gumikan kay ang pamilyang Ting diha man sa siyudad sa Talisay nagbayad sa ilang buhis alang sa maong luna.

Subling gipasabot sa mayor nga usa ka business decision ang iyang gibuhat nga pagbayad na lang sa maong luna aron maputol na ang pangangkon sa Talisay nga nasakop sa ilang hurisdiksyon ang maong luna.

Apan gikasabutan sa konseho nga iduso una sa buhatan sa City Attorney's Office ang maong isyu alang sa dugang pagtuon sa dili pa mopakanaog og tukmang desisyon.

Si Osmeña mitanyag sa pamilyang Ting nga mopalit sa maong luna sa kantidad nga P9 milyones apan ipaagi sa data data ang pagbayad niini nga tag P3 milyones ang tuig hangtud sa pagka impas niini. - Darrel A. Carumba