Operation Greyhound nakasakmit og kutsilyo, shabu gikan sa BBRC

Mga kutsilyo, talinis nga mga butang ug gidudahang shabu ang nasakmit sa kinalit nga Operation Greyhound sa bag-ong warden sa Bagong Buhay Rehabilitation Center kagahapon sa buntag.

Si Chief Inspector Efren Nemeño ang warden sa BBRC sa pakig-alayon kang Konsehal Agustus Pe ug mga sakop sa Cebu City Police Office pinanguluhan ni Supt. Melvin Gayotin nga gilangkuban sa 100 ka mga polis mironda sa maong bilanggoan.

Matud pa ni Nemeño nga duna nay kamandoan gikan ni Supt. Benito Dorigo sa pagpahigayon sa maong operasyon, nga mahimong adlaw-adlawon ang operation greyhound gumikan sa gipakitang pagtabang sa CCPO.

Nagsugod ang ronda alas 8 sa buntag ug natapos alas 11:30 na sa buntag diin ang pito ka brigada maoy gisiksik lakip na mga priso.

Nakuha ang 11 ka paketeng may sulod nga gidudahang shabu gikan sa brigada 5 nga gibitay diha sa bintana, ug dugang walo ka paketeng may lama sa samang gidudahang droga lakip na usab ang usa ka cellphone.

Ang BBRC dunay 2,499 ka mga bilanggo nga gidesenyo ra unta alang sa 250 ka tawo hinungdan sa grabeng kahuot niini.