Tigulang napaig

Patay ang usa ka 65-anyos nga babaye human kini matanggong sa nahitabong sunog tungod sa pagpangita sa iyang apo sa ibabaw'ng bahin sa ilang balay nga gikaon sa kalayo kagahapon sa udto diha sa Sityo Kimba, Barangay San Roque, dakbayan sa Talisay.

Ang danyos sa nahisgutang sunog mikabat sa P150 mil ug gipaubos kini sa ika-duhang alarma.

Napaig na nga naugkat sa mga bombero si Bernadita Cabilin kinsa nakaangkon og mga samad sa lawas. Ang apo niining si Emmanuel Lubas 11-anyos kinsa mibuak sa bildo sa bintana sa iyang kuwarto milayat ngadto sa likod nga bahin sa balay aron makalingkawas sa sunog.

Ang balay nga naugdaw gipanag-iya ni Paulino Lubas, 37-anyos umagad ni Cabilin, gigama sa konkreto ug gaay nga materyales.

Gibutyag ni Felipe Canillas, Fire Marshal sa Talisay nga electrical short circuit ang hinungdan sa sunog ug ang kalayo diha magsugod sa kisame sa kusina sa balay.

Matud ni Canillas nga si Emmanuel kinsa diha sulod sa iyang kuwarto nagduwa og computer game maoy unang nakamatngon nga nasunog ang ilang balay.

Giablihan ni Emmanuel ang pultahan sa iyang kuwarto tungod kay nakapanimaho kini og aso ug misinggit kini pagkakita sa dakong kalayo.

Si Cabilin ug Lubas dali nga misaka sa taas nga bahin sa balay aron mangita sa duha ka igsuon ni Emmanuel nga si John Paul, 6 anyos, ug Aljun, 5 anyos, kinsa ilang gituhoan nga diha sa kuwarto sa taas sanglit ang maong balay dunay lima ka lawak.

Apan tungod sa kadako na sa kalayo mibalik si Lubas og kanaog apan si Cabilin mipadayon og saka ug nagsusi sa mga kuwarto.

Si Cabilin walay kalibutan nga diha na diay sa gawas sa ilang balay ang iyang mga apo pagkahitabo sa sunog.

Si Canillas nagkanayon nga naglisod sila og pawong sa kalayo ug wala sila makapaduol sa balay nga nasunog tungod sa kahuot ug kalapukon sa karsada kay dapit man sa daruhan ang lugar hinungdan nga gisumpay-sumpay na lang nila ang ilang hose diin miabot og walo ka "length" ang ilang nasumpay.

Gibutyag usab ni Canillas nga si Fire Officer 2 Socrates Miñoza kinsa maoy nagmaneho sa fire truck giwarawarahan og pinote sa tag-iya sa mais nga naigo sa iyang pag-backing sa trak.

Nadawat sa kabomberohan ang alarma 12:15 ug napulo ka minuto napalong nila ang kalayo. Ang Pardo fire station mialarma usab sa maong sunog.