Panaghalok bisan kinsa kuyaw sa meningitis

Mipasidaan ang mga batid nga doktor sa kalibotan sa mameligro ang usa ka babaye o kaha lalaki karong umaabot nga Valentines Day sa sakit nga "meningitis" kon makalamoy silag nagkalainlaing laway gikan sa lainlaing babaye o lalake nga ilang kahawok.

Matud pa ni Mr. Robert Booy nga taga Prensya, iyang gipublikar sa British Medical Journal ang nahitabo sa 114 nga napaslak sa nagkalainlaing hospital sa England niadtong 1999 ug 2000.

Nahibulong ang mga doktor nga pulos masakiton og meningitis ang tanan busa gisukitsukit nila ang matag usa.

Didto nasayran nila nga ang maong mga batan-ong pulos diay sirok kaayo og sa hinawkanay nga bisan si kinsa lang ang basta ganahan sila ila gyung suklan og kombati sa hinawkanay.

Sa mga pagtuon sa mga doktor matud pa ni Booy, ang usa ka lalake o kaha babaye kinsa higal kaayo sa hinawkanay matag karon ug unya, may 3.7 ang tsantsa nga mataptan gyud sa sakit nga meningitis.

Nasayran nang daan matud pa ni Booy nga ang meningitis manukad sa "spinal cord" sa tawo.

Si Booy kinsa maoy hepe sa National Center for Immunization Research and surveilance sa Sydney, Australia nagkanayon nga ang masalbar niini mao ra kadtong tawong nagpabakuna nang daan og meningoccal nga medisina.

Matud pa niya nga mahimong koblan ang babaye o lalake niini nga di na hidutlan pag meningitis bisan pila pa ka libo ka hawkan matag adlaw basta aduna na siyay meningoccal vaccine ang lawas.

Midugang si Booy nga ang bation sa tawo nga taptan nag meningitis mao ang hilanat, labad sa ulo, pagpangtikig sa liog, magsukasuka, malipong ug kapoy na kaayng lawas.

Mosangpot kini sa pagkadaot sa utok, mabungol, unya hangtod mamatay.