60-anyos-nasakpang milugos og 15-anyos gipapriso

Nagtingkagol karon sa prisohan ang usa ka 60 anyos nga tiguwang kinsa nasakpan sa akto nga milugos ug nakighilawas sa 15-anyos nga dalagita didto sa sitio Tagaytay, Vito, Minglanilla niadtong Huwebes sa kaadlawon.

Si SPO1 Renato Masangkay, desk officer sa Minglanilla Police miila sa suspetsado nga si Simeon Gabiana, 60, biyudo ug way trabaho.

Samtang ang biktima nga usa ka 15 anyos nga dalagita kansang ngalan wala ibutyag sa kapolisan, silingan ra sa suspetsado sa Tagaytay.

Matud pa sa kapolisan nga nasakpan sa akto sa amahan sa biktima nga gipakighilawasan sa suspetsado ang biktima nianang ala 1:30 sa kaadlawon.

Human ipadakop ang suspetsado, gidala sa mga ginikanan ang biktima ngadto sa tambalanan ug didto nasuta nga napilde gyud ang pagkababaye sa biktima.

Apan ang kapolisan nga miimbestigar sa biktima nagkanayon nga makadaghan na diay lugosa sa suspetsado ang batan-ong biktima.

Gibutyag usab sa biktima sa kapolisan nga matag gamit kaniya sa tiguwang tiunan siya og kutsilyo, uban sa hulga nga patyon ang iyang mga ginikanan ug mga igsuon uban kaniya kun motug-an siya sa nahitabo.

Midugang usab ang biktima nga inighuman og gamit kaniya sa tiguwang hatagan siya og P20 niini.

Ang kapolisan nga nag-imbestigar sa hitabo nagkanayon nga kun wala pa hisayri sa amahan sa biktima, malagmit magpadayon nga dili masayran niini ang maong hitabo.

Wala usab momabdos ang biktima luyo sa dugay-dugay nang panahon nga gibuhat kaniya sa suspetsado.

Ang mga tigpaniid may pagtuo nga usa ka manyak ang tiguwang tungod kay bisan sa iyang katiguwang na nakahimo pa sa pag-among-among sa batan-ong dalagita, ug ang kihang pagpanglugos gisang-at na batok kaniya.