Loot di moapil sa imbestigasyon sa LBP rob tungod sa politika

Gumikan sa paglambigit sa pangalan ni Bogo Mayor Celestino 'Tining' Martinez sa kaso sa pagpanulis sa Land Bank Bogo mipadayag si Cebu Provincial Police Office Director Sr.Supt. Vicente Loot nga dili na moapil ang ilang buhatan sa pag-imbestigar sa maong kaso.

Kini maoy pamahayag ni Loot ngadto sa mga sakop sa media aron paglikay sa mga isyung politikal sanglit ang mga Martinez higpit nga kaatbang sa iyang asawang si Daanbantayan Mayor Maria Luisa Loot ug dayag na kaayo sa lalawigan ang kahigpit sa ilang panagribal.

Matud pa ni Loot nga ang Regional Investigation and Intelligence Division sa Police Regional Office 7 maoy mopadayon sa imbestigasyon ug pagsulbad sa kaso, samtang nasayran gikan kang Chief Inspector Juanito Enguera nga adto na sa Criminal Investigation and Detection Group isangon ang maong gimbuhaton.

Si Sumabong mipasangil diha sa iyang gipakatap nga VCD ug sa pamahayag sa telebisyon nga dunay kalambigitan ang mayor sa Bogo sa mga krimen sa maong lungsod lakip na sa pagtulis sa LBP.

Miangkon si Sumabong nga siya maoy mihimo sa surveillance diha sa maong bangko, nangangkon ug namasangil siyang si Mayor Martinez maoy naghatag kanila sa ilang kunsumo samtang gihimo pa ang pagplano.

Dugang sa iyang gipasangil mao nga gimandoan usab siyang patyon ang managtiayong Loot, apan wala niya kini mahimo gumikan sa mga kakulian.

Nangangkon si Sumabong kagahapon nga naa siyay mga ebidensyang makasuporta sa iyang pasangil batok sa mayor ug sa uban pang mga kahiwian niini.

Samtang si Loot sa iyang bahin daan nang namahayag nga kinahanglang mag-corroborate ang pangangkon ni Sumabong sa mga ebidensya una pa siya modesisyon sa pagpasaka og kaso kung tinuod man kini.

Ang amahan ni Martinez nga si kanhi Kongresista Celestino "Junie" Martinez mihimakak sa tanang pasangil batok sa ilang pamilya gumikan kay ang ilang pamilya maoy naningkamot nga mapalambo ang ilang lungsod ug nagprotiher sa mga magpapatigayon niini.