Koleksyon sa buhis diha sa CPA pangusgan ni Tomas

Hingusgan sa kagamhanan sa dakbayan sa Sugbo ang pagkolekta sa minilyon ka pesos nga bayranang buhis gikan sa Cebu Port Authority (CPA) karung tuiga.

Tuyo ni mayor Tomas Osmeña nga magamit ang makolektang buhis sa pagpatuman og dugang mga proyekto nga maoy gikinahanglan sa mga Sugboanon.

Gibutyag ni Osmeña atol sa press conference kagahapon sa udto nga plano nilang gamitan kun makolekta na unya ang bayranang buhis sa CPA nga gastuhon kini alang sa pagpaayo sa gubaon nga karsada sa North Reclamation.

Gibanabana sa mayor nga makagasto ang dakbayan og P50 ngadto sa P60 milyones alang sa himuong pag-ayo sa North Reclamation road apil na ang pag-usab sa drainage ug ang pag-repair sa sidewalk.

Gimanduan sa mayor ang City Engineerings Office alang sa himuong Program of Works and Estimates (POWE) niini.

Gipahibalo na sa mayor ang mga squatters sa maong lugar ilabi na kadtong nag-okupar na sa sidewalk nga bahin sa North Reclamation nga hinayhinay nang moguba sa ilang mga barong barong gumikan kay ipatuman gyud ang demolisyon sa higayun nga mosugod na unya ang himuong pag-repair niini.