Lakip sa gironda ang gianggaang "Little Pasil" diha sa Sitio Dita, barangay Pulangbato ning dakbayan, nabansagan kini niini gumikan sa gihulagway sa kapolisan nga grabeng pagkuyanap sa drogas sa nahisgutang lugar.
Ang grupo ni Supt. Pablo Labra, Senior Inspector George Ylanan , Senior Inspector Aureo Belandres armado sa search warrant nga giluwatan nila ni RTC branch 13 ug branch 15 First Vice Executive Judge Menrado Paredes ug Second Vice Executive Judge Fortunato De Gracia.
Nasikop mao sila si Recsil Seno, Bimbim Jumao-as pulos mga taga Sitio Dita, sa naasoy'ng barangay ug Jam Maraño nga taga Sitio Cabangahan sa barangay Pit-os ning dakbayan, samtang nakaipsot usab ang lain pang gisuspetsahang pusher nga si Rico Bontuyan molupyo usab sa Sitio Dita.
Nakuha diha sa panimalay ni Seno ang pito ka medium size nga plastik nga may sulod nga gidudahang shabu ug drug paraphernalia, nakuhaan usab og 28 ka paketeng may sulod nga gidudahang shabu ug paraphernalia si Jumao-as.
Samtang si Maraño kinsa gironda diha sa Pit-os nakuhaan og 10 ka paketeng may sulod nga gidudahang shabu ug tulo usab ka plastik nga may sulod nga gidudahang shabu gikan kang Bontuyan.
Atol sa ronda gisaksihan kini sa mga kabanay sa mga suspek ug mga opisyal sa barangay.
Ang Sitio Dita maoy gitumbok sa CIIB nga tubdanan sa mga drogas nga gisuplay diha sa mga bukirong barangay sanglit agianan kini sa mga habal-habal nga maoy nag-unang kustomer sa mga drug pushers sa maong dapit diin ang suplay gikatahong naggikan pa usab sa barangay Pasil ning dakbayan.
Sa laing bahin, nasikop sa kapolisan sa dakbayan sa Mandaue ang magtiayong gidudahang tigpayuhot og drogas diha sa barangay Umapad dakbayan sa Mandaue niadtong milabay'ng gabii.
Nagtingkagol karon sa karsel mao sila si Hilario Chua, alyas Jake, 50 ug Amelita, 36, human madakpi nila ni SPO1 Oliver Dacua, PO2 Raniel Cartin ug mga kaubanan sa Vice Squad Section sa Mandaue City Police Office.Nakuhaan ang duha sa buy-bust operation og pinaketeng shabu. – Uban sa taho ni Romeo Limpangog