Fight ni Pacquiao: 1 patay, 5 naangol

Ang kulbahinam nga rematched nila ni Filipino boxing icon Manny "Pacman" Pacquiao ug sa Mexican legend nga si Erik 'El Terrible' Morales miresulta sa pagkamatay sa usa ug pagkaangol sa upat ka tawo sa nagkadaiyang hinungdan apan may kalambigitan sa maong boksing.

Usa ka Julius Morsilla, 30 anyos, minyo ug molupyo sa Barangay Tapon lungsod sa Dumanjug ang namatay human kini maaksidente uban sa iyang silingang si Gilbert Calan, 21, dihang misampak sa usa ka sementadong poste sa railings diha sa national highway ang giluwanang motorsiklo sa duha.

Sa migawas nga balita kagahapon gikatahong mipalit og tuba ang biktima ngadto sa barangay Poblacion aron imnon samtang nagpaabot sa main event ni Pacquiao ug Morales, apan gumikan sa pagdali nawad-an og kontrol ang motorsiklong gimaneho niini ug misampak sa kongkretong poste sa railings sa kalsada, gumikan sa kakusog sa pagsampak naparok si Morsilla sa semento ug namatay samtang naangol usab si Calan.

Samtang diha sa lungsod sa Argao, usa ka 36 anyos nga lalaki ang natigbasan sa iyang silingang fan ni Morales, matud pa sa kapolisan nag-inom ang duha samtang nagtan-aw og telebisyon diha sa barangay Bogo sa naasoy'ng lungsod.

Si Romulo Luta, minyo, molupyo sa maong dapit gitigbas sa iyang higalang si Maximo Datuin Solis, 25,taga barangay Mabasa sa samang lungsod apan temporaryong nagpuyo sa samang barangay.

Nasayran sa imbestigasyon sa Argao police sa pakighinabi sa Banat News nga gisapot si Solis sa pagkapilde ni Morales ug kalit nga gihulbot ang bolo sa kauban usab sa pag-inom nga si Manuel Panugan ug gitigbas sa tangkugo si Luta.

Sa Isidro C. Kintanar Memorial Hospital milandig si Luta samtang nasikop usab ang suspek ni PO3 Ricardo Dela Peña sa Regional Intelligence and Investigation Division ug giturn-over sa Argao police station.

Sa dakbayan sa Lapu-Lapu, usa ka Ramelito Tero, 22 anyos, ang napusilan sa likod samtang naglayat-layat agi'g pag-abiba kang Pacquiao samtang nagtan-aw og telebisyon diha sa iyang balay sa San Vicente, Gun-ob.

Nasayran nga ang silingang si Hilario Casado de Leon, 44, matud pa ni PO3 William Jomoc maoy nakapusil sa biktima.

Ang asawa sa suspek nga si Belen, mitug-an nga naglalis silang duha sa iyang bana human niya kini gikataw-an pagkalukapa ni Morales nga miresulta sa pagkuha sa suspek og armas ug nagpabuto makadaghang higayon diha sa luyo sa ilang balay.

Gisuwayan og pugong ni Belen ang suspek apan giwakli lang siya niini gumikan sa kalagot sa kapildihan ni Morales ug mipabuto pag-usab hinungdan sa pagkaigo ni Tero. Arestado ang suspek sa mga polis inubanan sa sakop sa PAF nga si S/Sgt Teofilo Gemani.

Sa laing hitabo diha sa barangay Tugbungan, Consolacion usa ka fan ni Pacquiao nga nahugyaw sa kalipay sa pagtan-aw sa replay sa boksing ang gitigbas sa iyang silingang gituuhang nalisuan sa pangisip nga si Edgar Suico, 46.

Matud pa ni SPO1 Ricardo Ermac sa pakighinabi sa Banat News nga si Nicanor Soltares nakasagang sa pagtigbas sa suspek kinsa gituuhang naguol sa kapildihan ni Morales.

Samtang ang deputy chief for administration sa Cebu Provincial Police Office nga si SPO4 Nelson Batiduan nadala sa Mactan Doctor's Hospital human mosaka ang blood pressure human makatan-aw sa away ni Pacquiao.