Duha ra ka barangay sa Talisay ang mituman

Kasagarang barangay sa Talisay wala motuman sa lagda sa hustong paglabay sa basura sumala pa ni Atty. Aurora Econg ang City Legal Office.

Matud pa ni Econg nga wa siya magdahom nga ang ubang mga barangay magpabilin diay nga buta-bungol sa maong balaod ilabi na niining gipatumang "no segregation, no pick-up policy" sa ilang mga basura, sa pagkakaron matud pa niya duha lang sa 27 ka barangay ang misunod niini.

Nasayran gikan kang Kapitan Ramil Manayon nga ang barangay Bulacao ug Lawaan I ra maoy hingpit nga mituman ning maong balaod sa pagkakaron.

Si Manayon maoy Environment Solid Waste Management Task Force Action officer, samtang si Econg maoy nanguna usab sa Ecological Solid Waste Management Board, diha sa Talisay.

Matud pa ni Econg nga nunot ning gibaod karon nga dakpon na ang mga malapason sa balaod sa basura, daghan kaayong panghidakpan niini karong sunod semana.

Kini tungod sa kadaghang barangay nga wa magpakabana ning maong balaod, matud pa niya.

Hinuon gipanag-ing ni Econg sa taga dakbayan sa Bais ug Dumaguete sa Negros Oriental diin hangtod karon nagpabilin gihapong wa kaayo maedukar ang mga molupyo sa maong mga lugar luyo sa kamatuoran nga sukad pa sa tuig 2000 nakamontar na silag sanitary landfill.