Mga danyos nga gibilin sa Sinulog mardi gras

Sama sa mga nangaging selebrasyon sa Sinulog, nagpasad ang basura sa kadalanan ug ingon man mga danyos diha sa mga kabtangan sa dakbayan gumikan sa nagdasok nga mga tumatan-aw sa Grand Mardi Gras diha sa dagkong kalsada sa dakbayan.

Usa sa mga namatikdan sa Banat News nga grabe og kadaut mao ang mga pananom sa Parks and Playgrounds nga giamuma sa tibuok tuig apan yatak-yatakan lang pag-abot sa selebrasyon sa Sinulog.

Ang center islands sa dalan P. del Rosario pangadto sa Martires wala pasayloa sa mga tumatan-aw, ang mga pananom nga duha ka adlaw una pa ang selebrasyon gipangkuralan sa taga Parks and playgrounds pag-abot sa alas singko sa kahapunon daw giagian na kini og bagyo.

Mao usab ang nahitabo sa center islands diha sa Jones Avenue nga gikuralan na og kabilyang tinalinsan, gibutangan og bara-barang kahoy nga gihikot og alambre aron dili mabuka kun mahitabong tungtungan wala usab makalingkawas sa mga tumatan-aw.

Kagahapon pipila ka mga pundok sa mga batan-on ang nakit-an sa Banat News nga namatong sa maong mga kural aron lang makakita sa mga contingents, walay bisan usa ka awtoridad ang nakabadlong hangtud nga nabukaka na pag-ayo ang maong mga kabilya ug nangayatakan ang mga tanom.

Sa laing bahin duna ray natalang 48 ka mga alarma atol sa maong selebrasyon diin gikalambigitan sa pagpanguot, pareglahay, dunggab ug aksidente sa kadalanan nga gikalambigitan sa duha ka bata ug mga sakop sa Mobile Patrol Group, si Supt. Melvin Gayotin sa sayo pa kagahapon nga pakighinabi sa Banat News mitug-an nga dunay gibana-banang 5,000 ka mga security forces nga gideploy lakip na ang mga volunteers ug mga sakop sa Central Command.