Vendors sa basilica mopahawa human sa hubo sa Señor

Dili pa mopahawa ang mga manindahay og rebolto sa Basilica Minore del Sto. Niño ug mga kandila diha sa Magellan's Cross kilid mismo sa Basilica Lunes human Sinulog mardi gras.

Kini bisan pa man og kutob lang sa Sinulog ang gihatag nga tagal ni Mayor Tomas Osmeña ngadto kanila nga makapaninda sa maong lugar.

Gibutyag ni Carmen Aton, tigpamaba sa dul-an sa 20 ka mga vendors sa Magellan's Cross nga kini tungod kay hangtud pa sa hubo sa Sr. Sto. Niño unya sa petsa 22 ning bulana ang gipangayo nila nga lugway nga pagpaninda sa maong lugar.

Matud ni Aton nalatid kini sa ilang suwat hangyo ngadto sa mayor nga ilang gipadangat ngadto ni Gerry Marquez, consultant sa urban poor sa City Hall, niadtong petsa 3 niining bulana.

Matud ni Aton pagkakaron wala pa gyud sila magkasabot sa ilang mga kaubanan kun unsay buhaton aron dili sila maputlan og kapanginabuhian nga pagpaninda og rebolto sa santos ug mga kandila diha sa maong lugar.

Kini tungod kay bisi pa kaayo sila ning mga higayona sa ilang pagpamaligya nunot usab sa nagkaduol na nga Pista Señor.

Apan plano nila nga mohangyo ug magpakiluoy sa mayor human sa Sinulog nga ipabilin lang silang mga karaang mga vendors diha sa maong lugar ug kadto lang mga bag-o ang papahawaon.

Ang Parks and Playground Commission maoy mireklamo sa maong mga vendors sa Magellan's Cross ilabi na gyud niadtong mga vendors nga nagtukod og mga tulda nga nakasalimbong sa mga kahoy nga naglibot sa Magellan's Cross nga nakahatag og kasamok sa lugar.