Canadian mitiyabaw sa inhustisyang gidangatan

Langyaw'ng giaresto pinasikad sa warrant of arrest gikan sa Pasay City niadtong Disyembre 29,2005 dinhi sa dakbayan sa Sugbo gumikan sa kasong "large scale stafa" mihimakak sa maong kaso ug mitiyabaw sa inhustisyang iyang gidangatan.

Sumala pa sa suwat nga gipadangat dinhi sa Banat News gikan sa suspek nga si Paul Ernest Dumont siya usa ka Canadian national ug nagpuyo dinhi sa Pilipinas sulod sa napulo na ka tuig. Siya konektado sa Enhance Immigration and Documentation Consultants (EIDC) nga maoy naghikay sa mga dokumento sa immigration visa sa mga aplikante buot makatrabaho sa Canada.

Si Dumont napatik dinhi sa Banat News sa banner story niadtong Disyembre 31,2005 human kini dakpa ni SPO3 Elmo Rosales sa Fuente Police Station diha sa buhatan ni Dumont sa dalan Mango Avenue.

Nahingangha si Dumont dihang siya gidakop pinasikad lang sa giamendahang warrant of arrest sa pangalang "Richard Briones" ngadto na sa alyas "Paul Ernest Dumont" nga maoy iyang pangalan .

Ang warrant naglambigit sa kasong ilegal nga pagpangrekrut niadtong 2001 didto sa Pasay City diin giingong si Dumont ug tulo pa ka mga tawo midawat og P50 mil gikan sa upat ka giingong biktima.

Si Dumont nagkanayon nga diha palang sa information sheet ug sa reklamo sa upat ka giingong complainants (mga ngalan gipugngan) wala na mahisguti ang iyang tinuoray nga pangalan hangtud lang niadtong Disyembre 16, 2005 sa giamendahang mosyon nga nagtumbok kaniya nga siya si Briones.

Nabantayan sa Banat News nga sa kopya sa reklamo batok sa usa ka Richard Briones wala mabutang kun usa ba kini ka langyaw'ng tawo, si Dumont usa ka "caucasian"(diin mga puti ang pamanit) ug dili basta masaypang Pilipino kay puti usab ang panit ni Dumont.

Gikwestiyon karon ni Dumont kun posible ang nahitabo kaniya nganong misaler sa korte ug piskalya sa Pasay City ang iyang kaso nga wala gani manigurado sa pagkatawo sa tawong ginganlan og Richard Briones una kini amendahe og ikaduha. Ang makaduha ka higayon nga gibasura ang "motion to quash arrest warrant" nga ilang gisang-at gamit ang rason nga nakitang iregularidad sa kaso batok kaniya.

Nagduda si Dumont nga walay hustisya nga iyang makab-ot sa kasamtangang dagan sa iyang kaso.