Tulis sa taxi misiaw na sab

Nagkurog pa sa kalisang ang usa ka taxi driver nga midangop sa kapolisan human kini mabiktima sa pagpanulis sa tulo ka wala hiilhing pasaherong lalaki sa miaging gabii sa Pier 7 sa Subangdaku, siyudad sa Mandaue.

Ang biktima mao si Ramil Torillo, 30 anyos, minyo nga taga Basak Pardo sa dakbayan sa Sugbo ug driver sa M taxi nga nagdala sa plate number nga GVM 234.

Ang tulo ka pasahero sa biktima ang pulos gayod naghupot og mahait nga hinagiban ug dungan nga gition dayong deklarar nga tulis.

Ang biktima nakuhaan sa iyang P1,600 nga kitang salapi sa pagpasahero sa tibuok adlaw, cellphone ug antyohos nga Rayban.

Sumala ni PO3 Dindo Montesclaros nga ang biktima unang midangop sa Mabolo Police Station sa pagtuo nga ang Pier 7 ang sakop sa area niini.

Dugang pa ni Montesclaros nga dali nilang gihimoan og follow up human nila madawat ang maong alarma apan nakasibat gayod ang mga tulisan pahilayo sa maong dapit.