Canadian recruiter 'sikop sa kapolisan

Usa ka Canadian national nga nalambigit sa pagpang-recruit og mga Pilipino nga buot mogawas sa Pilipinas nasikop sa kapolisan tungod sa kasong "large-scale illegal recruitment"

Si Richard Briones, alias Paul Ernest Dumont, hingkod ang panuigon, tag-iya sa Enhance Visa Services nga nahimutang sa IAS Building, dalan Gen. Maxilom, Cogon-Ramos ning dakbayan, nasikop sa kapolisan sa Fuente Police Station.

Dala ang warrant of arrest nga giisyu ni Pairing Judge Tingaran Guiling sa Regional Trial Court Branch 108 sa Pasay City, ang kapolisan sa Fuente nga gipanguluhan ni SPO3 Elmo Rosales mironda sa opisina ni Briones.

Si Briones naposasan diha mismo sa iyang opisina ug mikuyog sa kapolisan nga malinawon paingong Fuente Police Station.

Si SPO3 Edilberto Solis mitug-an sa Banat News nga ang kasong large-scale illegal recruitment walay piyansa nga gitugot.

Sa kasamtangan, matud ni SPO3 Solis, ang Canadian national gitanggong sa selda sa Fuente Police Station samtang gitakda pa nilang pakigkitaan si RTC-7 Executive Judge Simeon Dumdum Jr. aron magpatabang sa paagi unsaon pagdala sa dinakpan ngadto sa Pasay City.

Miingon si SPO3 Solis nga walay reklamante batok sa Canadian recruiter dinhi sa Sugbo.

Sa Fuente Police Station, adunay mga babayeng mga Pilipino nga nagbabagbabag aron dili ma-interbiyu sa media si Briones ug dili makuhaan og hulagway.