Dumpit balik na!: Report nga napusilan sa Buhisan gimatuod nga bakak

Kontrobersyal ug gikahadlukan sa mga kriminal nga miyembro sa Cebu City Police Office nga mikawhat og atensyon pipila na ka bulan gumikan sa mga pasangil, mibalik na og serbisyo sugod kagahapon human sa unom lamang ka bulan nga pagbakasyon.

Gikumpirmar kini Criminal Investigation and Intelligence Branch chief, Pablo Labra II atol sa pakighinabi sa Banat News kagahapon, matud pa nga dunay kamanduan nga gipagawas si CCPO director, Supt. Melvin Gayotin niadtong Disyembre 7 nga nagmando kang Dumpit sa pagbalik na sa serbisyo.

Si Dumpit nabutang sa kontrobersiya pila na ka bulan ang milabay human dunay nanggawas nga istoryang dunay usa sa mga gituuhang sakop sa vigilante nga napusilan niadtong bulan sa tunga-tunga ning tuiga dihang gisuwayan og "hipos" si Alemar Luna, kanhi mayor de mayores sa Bagong Buhay Rehabilitation Center .

Apan walay nadangat nga report ngadto sa Homicide Section kalabot sa giingong dunay naigong usa sa duha ka gunmen nga sakay sa motorsiklo. Si Luna nakaangkon og 14 ka samad pinusilan sa iyang kalawasan apan luwas na kini sa peligro.

Sila si Mayor Tomas Osmeña, Labra ug Gayotin daan nang mipadayag nga dili katuohang miyembro si Dumpit sa vigilante ug kasamtangan kining nagtuman ra sa iyang silot didto sa ilang probinsya sa Davao.

Dili palang dugay gisuspenso og usa ka tuig nga way sweldo sa Ombudsman for the Military si Dumpit may kalambigitan sa kasong pagpamusil diha sa dalan McArthur ning dakbayan.

Nasayran gikan kang Atty. Leslie Salva ang abogado ni Dumpit sa pakighinabi sa The FREEMAN/Banat News nga wala gyud hingpit mapatuman ang suspensyon niini gumikan kay nakapadangat sila og petisyon for review sa Court of Appeals nga mipagawas usab og temporary restraining order sulod sa 60 ka adlaw ug mintras wala pay notisya niini magpadayon sa iyang trabaho si Dumpit.

Niadtong Disyembre 1 nakadawat sila si Dumpit og notisya gikan sa CA nga nagpahibalong gisumitir na para sa pagpagawas og resolusyon ang petisyong gipangayo ni Dumpit.

Si Dumpit mibalik na kagahapon sa iyang mother unit sa CIIB ug gidestino pagbalik isip bodyguard ni Mayor Tomas Osmeña diha sa City Hall.