Gibutyag ni Rama sa Banat News nga tumong sa maong tigum aron sulbaron ang nagkagubot nga suliran sa wiring niini nga nagkatag lang daplin sa dalan og ang uban nakahatag pa gyud og kasamok sa ibabaw'ng bahin sa pipila ka mga kadalanan dinhi sa dakbayan.
Gitumbok ni Rama ang mga nagsapaw nga mga wiring sa mga kadalanan ning dakbayan nga gawas nga hugaw kaayung tan-awon makahatag usab kini og peligro ilabina kon dunay mga habog nga sakyanan nga mo-agi nga posibleng masangit.
Gikasabutan sa maong tigum nga unahon sa pag-atiman ang nagkatag nga mga wiring sa rota sa Sinulog mardigras unya sa Enero sunod tuig gumikan kay posibleng masangit ning maong mga wire ang mga entrante sa float category.
Kini diha sa P. Del Rosario gikan sa Osmeña Boulevard hangtud sa Junquera ug P. Del Rosario hangtud sa D. Jakosalem ug Imus, apil na niini ang General Maxilum gikan sa D. Jakosalem hangtud sa Redemptorist church paingon na sa Cebu City Sports Center.
Apil sa nitambung sa maong panagtigum mao ang Sr. Manager sa PLDT nga si Mr. Dionisio "Dingdong" Pesayco III, tigpamaba sa Veco Ethel Natera, Globelines, Skycable, Bayantel, Eastern Telecom,INNOVE ug PT&T.
Gibutyag ni Pesayco nga nagsugod ang mao nilang kalihukan niadtong petsa 27 sa Oktobre nga gilihok sa tanang mga telecommunication company dinhi sa dakbayan.
Sunod nilang limpyohan mao ang rota unya nga maoy agi-an sa prosesyon sa Sinulog ug pagkakaron padayon pa nilang gipanid-an kon unsang mga kalsada ang agian sa rota.