Mohabwa sa natural gas nangabot na

Mikalit lang kaalegre ang lungsod sa Aloguinsan karong nangabot na ang mga kahimanan aron habwaon ang "natural gas" nga deposito sa barangay Olango, sa maong lungsod.

Matud pa ni Bise Mayor Ernesto Secuya sa Aloguinsan, ang tanang mga heavy equipments sa kontraktor nga DESCO Construction Inc. nangabot og midunggo na sa baybayon sa Aloguinsan haduol sa munisipyo niini.

Matud pa ni Secuya nga ang DESCO Construction Inc. maoy gikontrato sa taga Gas 2 Grid, ang nakigkontrato sa Department of Energy (DOE) nga maoy mohabwa sa natural gas sa Olango.

Gikalipay kaayo sa taga Aloguinsan ang maong kaugmaran tungod kay sukadmasukad karon pa sila makabaton og industriya nga sama niini diin makatabang og daku sa ginagmay'ng panginabuhi sa mga molupyo.

Ang mga pagpaninda og pagkaon, ilimnon, sigarilyo ug uban pa maoy unang mabulahan niini, matud pa ni Secuya.

Kini tungod kay ang lugar nga adto ipahigayon ang pagmina sa natural gas tua ang daghang trabahante niini, matud pa ni Secuya.

Walay laing dagkung industriya ang Aloguinsan, gawas lang sa ginagmay nga bakery ug sarisari store.

Ang pagdiskobre og natural gas, usa ka matang sa hinungaw sa oil deposit, daan nang nadiskobrehan sukad pa sa tuig 1960 pinaagi sa Acoje Mining Company, matud pa ni Secuya.

Pinaagi sa mga datos nga nahiposan sa DOE gikan sa Acoje, mao usab kini ang gisubay karon sa usa ka langyaw'ng kontraktor ang Gas 2 Grid, matud pa ni Secuya.