4-bigtime pushers 'dakpan

Napalpak ang transaksiyon sa mga gidudahang mga bigtime drug pushers human mapanid-i sa mga sakop sa Vice Control Section ang ilang kalihukan niadtong milabayng gabii diha sa atubangan sa usa ka inilang restobar sa dalan V.Rama ning dakbayan sa Sugbo.

Arestado ang upat ka mga suspek nga sila si Jovencio Perez Retuerto alyas Kulit, 42, taga Barangay Pagsabungan, Mandaue City , Wilfredo Abellana Vega alyas Itik, 44, taga Cansojong, Talisay City, Rodrigo Cancamo Cansacio alyas Badang,43, taga General Maxilom Avenue ug Niel Enemecio Tadlip alyas Boyet,34, taga Sunrise Village, Pardo ning dakbayan.

Sila si Inspector George Ylanan sa VCS sa Cebu City Police Office nakadawat og impormasyon kalabot sa usa ka dakong transaksyon tali sa grupo sa mga bigtime drug pushers nga gituohang sila si Eugene Alegre ug uyab niining nailhan lang sa ngalan nga "Goldilock" ug usa ka alyas "Kulit" sa nahisgutang lugar.

Pasado alas 8 na sa gabii niadtong Sabado nagpaabot ang VCS sa grupo ug dangtan og pagka alas 11 sa gabii nangabot ang mga suspek ug mihimo na sa ilang transaksyon hinungdan sa ilang pagkaaresto.

Nakuha gikan kang Retuerto ang duha ka dagkong plastik nga may sulod nga gidudahang shabu, usa ka timbangan ug usa ka Mitsubishi Lancer kolor itom nga may plakang GJF-606.

Samtang nakuhaan usab sila si Vega, Cansancio ug Tadlip ug tulo ka dagkong plastik nga may sulod nga gidudahang shabu, drug parapahernalia ug usa ka Nissan Urvan nga kolor puti nga may plakang YBE-562.

Lakip sa narekober sa kapolisan ang usa ka paper bag nga gituohang nabiyaan ni Goldilock nga may sulod deposit slip nga may nagkalain-laing kantidad sa Equitable PCI Bank nga iya sa pangalan ni Eugene Alegre, duha ka wala nay sulod nga dagkong plastik, timbangan ug shabu paraphernalia.

Gituohang si Goldilock ang babayeng daling miikyas atol sa paghamag sa mga polis sa nagtransaksyon sa drugas, luwan kini sa usa ka kolor silver nga pick-up nga may plakang YBB-199 nga giingong wala gyud maabti sa mga migukod nga mga polis.

Kahinumduman si Eugene Alegre sa milabayng bulan nakagawas sa Bagong Buhay Rehabilitation Center human ibasura sa korte ang kasong gipasaka batok kaniya nila ni Ylanan niadtong bulan sa Enero gumikan sa pagkasakop sa usa ka kilong shabu.