Tulisan nga mangarnap nahagsa sa motorsiko

Suspetsadong tulisan kinsa mitulis ug mi-carnap sa motorsiklo sa 23-anyos nga lalaki ug sa uyab niini nabalian sa iyang bukog tungod sa pagka-crash sa motorsiklo niining gisakyan diha sa karsada dihang gigukod kini ni PO2 Jorick Roma nga nadestino sa crime laboratory diha sa Camp Sotero Cabahug Gorordo Avenue niining dakbayan niadtong Domingo sa gabii diha sa Carmen Village Barangay Poblacion dakbayan sa Talisay.

Ang suspetsadong si Rowel Guinito hingkod ang panuigon taga Barangay Cogon, Pardo niining dakbayan nakaangkon og bali sa iyang walang abaga ug bun-og sa lawas diin dali kining gidala ni Roma sa Talisay District Hospital apan gibalhin kini sa Miller Hospital.

Ang biktima nga si Ernesto Abasolo, 23, nakaangkon og samad sa iyang liog dapit sa tuo ug sa tuong kamot niini tungod kay misukol kini sa kauban ni Guinito kinsa mition kaniya og kutsilyo.

Nasakmit ni Roma gikan ni Guinito ang usa ka ice pick nga gituhoang gigamit sa pagpanulis ug nabawi usab ang 3310 cellphone ug ang XRM nga motorsiklo sa biktima nga nagtangag sa plakang YW-2432.

Ang biktima nga taga Sitio Lower Mahayahay Barangay Candulawan dakbayan sa Talisay nagkanayon sa pakighinabi niini sa Banat News nga iyang gitudloan sa pagmaneho og motorsiklo ang iyang uyab, mibagting ang iyang cellphone hinungdan nga mihunong sila para basahon ang mensahe niini.

Tulo ka tawo ang kalit nga miduol kanila diin usa niini milayog sa iyang liog ug mition og kutsilyo ug laing usa ang mition usab ngadto sa iyang uyab og kutsilyo diin gikuha ang iyang cellphone ug gisakyan ang iyang motorsiklo.

Si Roma atol nga miagi sa lugar sakay sa iyang kotse paingon ngadto sa Inayawan nakit-an niini ang biktima nga nangayo og panabang hinungdan nga gigukod niini ang mga tulisan.

Si Roma midungag nga mipabuto siya sa iyang .45 kalibre nga service firearms para sa warning shot ngadto sa mga suspetsado diin nag-ikis-ikis ang motorsiklo nga gisakyan niini og nahagbong sa karsada ang mga kauban ni Guinito diin dali nga nakaikyas ug padayon pa kining gipangita karon sa mga awtoridad.