Habalhabal nabangga sa poste sa VECO, 4 naangol

Upat ka tawo ang naangol diin usa kanila ang kritikal ang kahimtang human mabangga sa poste sa VECO ang ilang gisakyang habal-habal niadtong Martes sa gabii diha sa Camella Homes Barangay Lawaan I dakbayan sa Talisay.

Ang mga biktima nga nanglabay sa karsada mao sila si Genefer Canteveros, 32-anyos, residente sa Barangay Pook sa maong siyudad, drayber sa motorsiklo nga pasaheroan nga nagtangag sa plakang LT-1164, Elena Segara, hingkod ang panuigon kinsa nakaangkon og grabeng kadaot sa iyang ulo ug naa karon sa kritikal ang kahimtang, Emma Bacalso hingkod ang panuigon ug Charmaine Lastimosa hingkod usab ang panugion.

Ang mga biktima daling gidala diha sa Vicente Sotto Memorial Medical Center niining siyudad.

Base sa imbestigasyon sa kapolisan sa traffic division sa Talisay, ang mga biktima gikan sa bukirang bahin sa siyudad ug midulhog paingon sa ubos sa dihang wala na makontrolar ni Canteveros ang manabela sa motorsiklo tungod sa kakusog sa dagan niini hinungdan nga mideretso kini diha sa poste.